ಆಳಂದ: ಗ್ರಾಮೀಣ ಪ್ರದೇಶದಲ್ಲಿ ಪತ್ರಿಕೋದ್ಯಮದ ಮೂಲಕ ಸಮಾಜಸೇವೆ ಮಾಡುವ ಆಕಾಂಕ್ಷಿಗಳಿಗೆ ಹೊಸ ಶಕ್ತಿ ಮತ್ತು ದಿಕ್ಕು ಸಿಗುವಂತೆ ರೂಪುಗೊಂಡ ಒಂದು ದಿನದ ವಿಶೇಷ ಉಚಿತ ತರಬೇತಿ ಶಿಬಿರವು ಇಂದು ಆಳಂದನಲ್ಲಿ ಯಶಸ್ವಿಯಾಗಿ ಜರುಗಿತು. ಆಳಂದ ಪಟ್ಟಣದಲ್ಲಿ ಸ್ಥಳೀಯ ಪತ್ರಕರ್ತರು ಹಾಗೂ ದಿ ಎಂಪವರ್ ಇನ್ಸ್ಟಿಟ್ಯೂಟ್ ಆಫ್ ಮ್ಯಾನೇಜ್ಮೆಂಟ್ & ಸ್ಕಿಲ್ಸ್, ಆಳಂದ ಇವರ ಸಂಯುಕ್ತ ಆಶ್ರಯದಲ್ಲಿ ಶನಿವಾರ ಆಯೋಜಿಸಲಾದ ಈ ಶಿಬಿರವು ಗ್ರಾಮೀಣ ಪತ್ರಿಕೋದ್ಯಮದ ಕ್ಷೇತ್ರದಲ್ಲಿ ಹೊಸ ಅಧ್ಯಾಯವನ್ನು ತೆರೆದಿತು.
ಶಿಬಿರದಲ್ಲಿ ಆಧುನಿಕ ಪತ್ರಿಕೋದ್ಯಮದ ತಂತ್ರಗಳು, ಡಿಜಿಟಲ್ ಮಾಧ್ಯಮ ನಿರ್ವಹಣೆ, ಸುದ್ದಿ ಸಂಗ್ರಹಣೆಯ ವಿಧಾನಗಳು ಹಾಗೂ ವರದಿಗಾರಿಕೆಯ ಹೊಸ ಕೌಶಲ್ಯಗಳ ಕುರಿತು ಗ್ರಾಮೀಣ ಪತ್ರಕರ್ತರು, ಯುವ ಬರಹಗಾರರು ಹಾಗೂ ಸಂಘ-ಸಂಸ್ಥೆಗಳ ಪ್ರತಿನಿಧಿಗಳಿಗೆ ಸವಿಸ್ತಾರವಾದ ತರಬೇತಿ ನೀಡಲಾಯಿತು. ಈ ಕಾರ್ಯಕ್ರಮ ಗ್ರಾಮೀಣ ಪತ್ರಿಕೋದ್ಯಮದ ಇತಿಹಾಸದಲ್ಲಿ ಗಮನಾರ್ಹ ಹೆಜ್ಜೆಯಾಗಿ ಪರಿಣಮಿಸಿದೆ.
ಬೀದರ್ ಸೇರಿದಂತೆ ತಾಲೂಕಿನ ವಿವಿಧ ಭಾಗಗಳಿಂದ ಆಗಮಿಸಿದ ಯುವ ಬರಹಗಾರರು, ಆಕಾಂಕ್ಷಿತ ಪತ್ರಕರ್ತರು ಹಾಗೂ ಸಂಘ-ಸಂಸ್ಥೆಗಳ ಪ್ರತಿನಿಧಿಗಳು ಹೆಚ್ಚಿನ ಉತ್ಸಾಹದಿಂದ ಶಿಬಿರದಲ್ಲಿ ಭಾಗವಹಿಸಿದರು. ಸಂಪನ್ಮೂಲ ವ್ಯಕ್ತಿಗಳಿಂದ ನೀಡಲಾದ ಮಾರ್ಗದರ್ಶನವು ತಮ್ಮ ವೃತ್ತಿ ಜೀವನಕ್ಕೆ ಹೊಸ ದಿಕ್ಕು ನೀಡಿದೆ ಎಂದು ಶಿಬಿರಾರ್ಥಿಗಳು ಅಭಿಪ್ರಾಯಪಟ್ಟರು.
ಶಿಬಿರದ ಪ್ರಮುಖ ಸಂಪನ್ಮೂಲ ವ್ಯಕ್ತಿಯಾಗಿ ಆಗಮಿಸಿದ ಹಣಮಂತ ಶೇರಿ ಖಜೂರಿ ಅವರು ತರಬೇತಿಯನ್ನು ನಡೆಸಿ ಮಾತನಾಡುತ್ತ, ಪತ್ರಕರ್ತತ್ವ ಎಲ್ಲರಿಗೂ ಸಾಧ್ಯವಾದ ಕ್ಷೇತ್ರವಾಗಿದ್ದು, ಕಲಿಯುವ ಆಸಕ್ತಿ ಮತ್ತು ಸತ್ಯದ ಮೇಲಿನ ನಿಷ್ಠೆ ಇದ್ದರೆ ಯಾರಾದರೂ ಉತ್ತಮ ಪತ್ರಕರ್ತರಾಗಬಹುದು ಎಂದು ತಿಳಿಸಿದರು. ಗ್ರಾಮೀಣ ವರದಿಗಾರಿಕೆಯಲ್ಲಿ ತಂತ್ರಜ್ಞಾನದ ಬಳಕೆಯ ಮಹತ್ವ, ಕೌಶಲ್ಯಗಳ ಅಭಿವೃದ್ಧಿ ಹಾಗೂ ಮಾಧ್ಯಮಗಳ ಘನತೆಯನ್ನು ಕಾಪಾಡಿಕೊಳ್ಳುವ ಅಗತ್ಯದ ಕುರಿತು ವಿವರವಾದ ಚರ್ಚೆ ನಡೆಸಿದರು.
“ಪತ್ರಕರ್ತನಾಗುವುದು ಬ್ರಹ್ಮವಿದ್ಯೆಯಂತಹ ಕಠಿಣ ವಿಷಯವಲ್ಲ. ಸಾಮಾನ್ಯ ನಾಗರಿಕನಿಗೂ ಆಸಕ್ತಿ ಮತ್ತು ಕಲಿಯುವ ಉತ್ಸಾಹವಿದ್ದರೆ ಪತ್ರಕರ್ತನಾಗಬಹುದು. ನಾಗರಿಕರಾಗಿ ಪತ್ರಕರ್ತರಾಗುವುದೇ ಸಮಾಜದ ಸತ್ಯವನ್ನು ಜನರ ಮುಂದೆ ತಲುಪಿಸುವ ಮಹತ್ವದ ಸಾಧನೆ,” ಎಂದು ಅವರು ಹೇಳಿದರು. ಗ್ರಾಮೀಣ ಪ್ರದೇಶದಲ್ಲಿ ಸುದ್ದಿ ಸಂಗ್ರಹಣೆಗೆ ಮೊಬೈಲ್ ಆ್ಯಪ್ಗಳು ಹಾಗೂ ಸಾಮಾಜಿಕ ಮಾಧ್ಯಮ ಸಾಧನಗಳು ಹೇಗೆ ಸಹಕಾರಿಯಾಗುತ್ತವೆ ಎಂಬುದನ್ನು ಪ್ರಾಯೋಗಿಕವಾಗಿ ತೋರಿಸಿ, ಭಾಗವಹಿಸುವವರನ್ನು ಕೌಶಲ್ಯಾಭಿವೃದ್ಧಿಗೆ ಪ್ರೇರೇಪಿಸಿದರು.
ಮಾಧ್ಯಮಗಳ ಘನತೆಯನ್ನು ಕಾಪಾಡುವುದು ಪತ್ರಕರ್ತರ ಪ್ರಥಮ ಕರ್ತವ್ಯ ಎಂದು ಒತ್ತಿ ಹೇಳಿದ ಅವರು, “ತಪ್ಪು ಸುದ್ದಿ ಹರಡುವ ಬದಲು ಸತ್ಯವನ್ನು ಧೈರ್ಯದಿಂದ ವರದಿ ಮಾಡಿ, ಸಮಾಜದಲ್ಲಿ ಬದಲಾವಣೆ ತರಬೇಕು,” ಎಂದು ಸಲಹೆ ನೀಡಿದರು.
ಶಿಬಿರದ ಅಧ್ಯಕ್ಷತೆಯನ್ನು ವಹಿಸಿದ್ದ ಹಿರಿಯ ಪತ್ರಕರ್ತ ಮಹಾದೇವ ವಡಗಾಂವ ಅವರು ಮಾತನಾಡಿ, ಯುವ ಪ್ರತಿಭೆಗಳನ್ನು ಗುರುತಿಸಿ ಹೊರತರುವ ಉದ್ದೇಶದಿಂದ ಈ ತರಬೇತಿ ಶಿಬಿರವನ್ನು ಪ್ರಥಮ ಬಾರಿಗೆ ಹಮ್ಮಿಕೊಳ್ಳಲಾಗಿದೆ ಎಂದರು. ಇಂದಿನ ಸಮಾಜದಲ್ಲಿ ಬರಹಗಾರರು ಹಾಗೂ ಹೋರಾಟಗಾರರ ಸಂಖ್ಯೆ ಕಡಿಮೆಯಾಗುತ್ತಿರುವುದು ಚಿಂತಾಜನಕ ಸಂಗತಿ ಎಂದು ಅಭಿಪ್ರಾಯಪಟ್ಟ ಅವರು, “ಇಂತಹ ತರಬೇತಿಗಳು ನಿರಂತರವಾಗಿ ನಡೆಯಬೇಕು. ಸೂಕ್ತ ತರಬೇತಿ ಹಾಗೂ ವೇದಿಕೆ ದೊರೆತರೆ ಗ್ರಾಮೀಣ ಭಾಗದ ಯುವ ಪ್ರತಿಭೆಗಳು ರಾಜ್ಯ ಮತ್ತು ರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡಬಹುದು,” ಎಂದು ಹೇಳಿದರು.
ಮಾಹಿತಿ ಇಲಾಖೆಗಳ ಮಾಹಿತಿಯನ್ನು ಸಂಗ್ರಹಿಸುವ ವಿಧಾನ ಹಾಗೂ ವರದಿಗಾರಿಕೆಯ ಪ್ರಾಯೋಗಿಕ ಅನುಭವಗಳನ್ನು ಹಂಚಿಕೊಂಡ ಅವರು, “ಗ್ರಾಮೀಣ ಪ್ರದೇಶದಲ್ಲಿ ಸುದ್ದಿ ಸಂಗ್ರಹಿಸುವಾಗ ಸ್ಥಳೀಯ ಭಾಷೆಯಲ್ಲಿ ಜನರೊಂದಿಗೆ ನೇರ ಸಂಪರ್ಕ ಸಾಧಿಸಿ ಸತ್ಯವನ್ನು ದಾಖಲಿಸಬೇಕು. ಇದು ಕೇವಲ ಸುದ್ದಿ ಬರವಣಿಗೆಯಲ್ಲ, ಸಮಾಜದ ಸಮಸ್ಯೆಗಳನ್ನು ಬೆಳಕಿಗೆ ತರುವ ಜವಾಬ್ದಾರಿ,” ಎಂದು ಯುವಕರಿಗೆ ಮನವರಿಕೆ ಮಾಡಿದರು.
ಮಾಧ್ಯಮ ಘನತೆ ಮತ್ತು ವ್ಯಕ್ತಿತ್ವ ನಿರ್ಮಾಣಕ್ಕೆ ಒತ್ತು: ದಿ ಎಂಪವರ್ ಇನ್ಸ್ಟಿಟ್ಯೂಟ್ ಆಫ್ ಮ್ಯಾನೇಜ್ಮೆಂಟ್ & ಸ್ಕಿಲ್ಸ್ನ ಸಂಸ್ಥಾಪಕ ಅಧ್ಯಕ್ಷ ರಫೀಕ್ ಇನಾಮ್ದಾರ್ ಅವರು ಮಾತನಾಡಿ, ಮಾಧ್ಯಮಗಳ ಘನತೆ ಮತ್ತು ಗೌರವವನ್ನು ಕಾಪಾಡಿಕೊಳ್ಳುವುದು ಪತ್ರಕರ್ತರ ಪ್ರಮುಖ ಕರ್ತವ್ಯವಾಗಿದೆ ಎಂದರು. “ರೌಡಿ, ಗೂಂಡಾಗಳು ಅಥವಾ ರಾಜಕಾರಣಿಗಳಂತೆ ವರ್ತಿಸಬೇಡಿ. ಕಾನೂನುಗಳನ್ನು ಗೌರವಿಸಿ, ಸಮಾಜದ ವಾಸ್ತವಕ್ಕಾಗಿ ಕೆಲಸ ಮಾಡಿ. ಯುವ ಪ್ರತಿಭೆಗಳು ಸ್ವಾರ್ಥಕ್ಕಾಗಿ ಅಲ್ಲ, ಸಮಾಜಕ್ಕಾಗಿ ತಮ್ಮ ಕೌಶಲ್ಯಗಳನ್ನು ರೂಢಿಸಿಕೊಳ್ಳಬೇಕು,” ಎಂದು ಅವರು ತಿಳಿಸಿದರು.
ಸಂಘ-ಸಂಸ್ಥೆಗಳ ಪ್ರಾಥಮಿಕ ವರದಿಯಿಂದ ಹಿಡಿದು ವ್ಯಕ್ತಿತ್ವ ನಿರ್ಮಾಣದವರೆಗೆ ಗಮನಹರಿಸಬೇಕು ಎಂದು ಸಲಹೆ ನೀಡಿದ ಅವರು, “ಇಂತಹ ಶಿಬಿರಗಳು ಹೊಸ ಅವಕಾಶಗಳ ಬಾಗಿಲು ತೆರೆಯುತ್ತವೆ. ಗ್ರಾಮೀಣ ಪತ್ರಿಕೋದ್ಯಮವನ್ನು ಬಲಪಡಿಸಿ, ಸಮುದಾಯದ ಧ್ವನಿಯಾಗಿ ನಿಲ್ಲಿ,” ಎಂದು ಉತ್ತೇಜಿಸಿದರು.
ಪ್ರಮಾಣಪತ್ರ ವಿತರಣೆ: ಶಿಬಿರದ ಅಂತ್ಯದಲ್ಲಿ ಭಾಗವಹಿಸಿದ ಎಲ್ಲಾ ಪತ್ರಕರ್ತರು, ಯುವ ಬರಹಗಾರರು ಹಾಗೂ ಸಂಘ-ಸಂಸ್ಥೆಗಳ ಪ್ರತಿನಿಧಿಗಳಿಗೆ ಪ್ರಮಾಣಪತ್ರಗಳನ್ನು ವಿತರಿಸಲಾಯಿತು. ಬೀದರ್ ಹಾಗೂ ಆಳಂದ ತಾಲೂಕಿನ ವಿವಿಧ ಗ್ರಾಮಗಳಿಂದ ಆಗಮಿಸಿದ ಶಿಬಿರಾರ್ಥಿಗಳಲ್ಲಿ ಈರಯ್ಯ ಸ್ವಾಮಿ, ವೆಂಕಟೇಶ ರಾಥೋಡ್, ಪ್ರಮೋದ ರಾಥೋಡ್, ಮೊಹಮ್ಮದ್ ರಫೀಕ್, ಕುಪೇಂದ್ರ ಎಸ್. ಹೊಸಮನಿ, ಶೇಖರ್ ಎಸ್.ಕೆ., ಸಂಜುಕुमार ಆರ್. ಕಾಂಬಳೆ, ಭೀಮಾಶಂಕರ್ ಎಂ., ದಿಲೀಪ್ ಕ್ಷೀರಸಾಗರ್, ತಾನಾಜಿ ಲೌಟೆ, ಮೈಬೂಬ್ ತಂಬೋಲಿ, ಬುಧಪ್ರಿಯ ಮೂಲಭೂತಿ, ನರಸಿಂಗ್ ಮಹೇಂದ್ರ ಕ್ಷೀರಸಾಗರ್, ಹಿರಿಯ ಪತ್ರಕರ್ತ ಶರಣಬಸಪ್ಪ ವಡಗಾಂವ, ಮಹೇಶ್ ಸಾಕ್ರೆ, ಸಲ್ಮಾನ್ ಖಾನ್, ಆಕಾಶ್ ದೇಗಾಂವ ಸೇರಿದಂತೆ ಅನೇಕರು ಭಾಗವಹಿಸಿ ತರಬೇತಿಯ ಲಾಭ ಪಡೆದರು. ಶಿಬಿರವನ್ನು ಪತ್ರಕರ್ತ ಡಾ. ಅವಿನಾಶ್ ದೇವನೂರ ಅವರು ನಿರೂಪಿಸಿ ವಂದಿಸಿದರು.
ಶಿಬಿರಾರ್ಥಿಗಳ ಅನುಭವ: ಶಿಬಿರದಲ್ಲಿ ಪಾಲ್ಗೊಂಡ ಶಿಬಿರಾರ್ಥಿಗಳು ತಮ್ಮ ಅನುಭವಗಳನ್ನು ಹಂಚಿಕೊಂಡು, “ನಾವು ಹಲವು ರಾಜ್ಯ ಮತ್ತು ಜಿಲ್ಲಾ ಮಟ್ಟದ ತರಬೇತಿ ಶಿಬಿರಗಳಲ್ಲಿ ಭಾಗವಹಿಸಿದ್ದೇವೆ. ಆದರೆ ಈ ಶಿಬಿರ ಅತ್ಯಂತ ಅರ್ಥಪೂರ್ಣವಾಗಿದ್ದು, ನಮ್ಮ ವರದಿಗಾರಿಕೆಗೆ ಹೊಸ ದೃಷ್ಟಿಕೋನ ನೀಡಿದೆ,” ಎಂದು ಬೀದರ್ ಜಿಲ್ಲೆಯಿಂದ ಆಗಮಿಸಿದ್ದ ಪತ್ರಕರ್ತ ಕುಪೇಂದ್ರ ಹೊಸಮನಿ ಹಾಗೂ ಈರಯ್ಯ ಸ್ವಾಮಿ ಜಿಡಗಾ ಅವರು ಹೇಳಿದರು.
ಗ್ರಾಮೀಣ ಪತ್ರಿಕೋದ್ಯಮವನ್ನು ಬಲಪಡಿಸುವ ಈ ಅವಕಾಶವನ್ನು ಸದುಪಯೋಗಪಡಿಸಿಕೊಂಡ ಶಿಬಿರಾರ್ಥಿಗಳು, ಭವಿಷ್ಯದಲ್ಲಿ ಇಂತಹ ಕಾರ್ಯಕ್ರಮಗಳು ಇನ್ನಷ್ಟು ನಡೆಯಬೇಕು ಎಂಬ ಆಶಯವನ್ನು ವ್ಯಕ್ತಪಡಿಸಿದರು.
